Tuesday, February 2, 2016

ദൈവത്തെയോർത്ത് ..




ദൈവത്തോട് പറയാനുള്ളത് 


തട്ടുംപുറത്തിരുന്നു സദാ 
മനുഷ്യരുടെ നന്മ തിന്മകളുടെ 
കണക്ക് എഴുതി തീർക്കാനുള്ളതല്ല 
ദൈവമേ നിന്റെ ജീവിതം. 
അൽപ്പ സമയം ജന്തു ജാലങ്ങളുടെ
കാര്യവും പിന്നെ സമയം കിട്ടുമെങ്കിൽ
അവനവന്റെ കാര്യം കൂടി 
നോക്കുന്നതാകും ഇനിയങ്ങോട്ട് നല്ലത്. 
മനുഷ്യമാരിനി നിങ്ങളെ പേടിച്ച് 
നന്നാകാനൊന്നും പോകുന്നില്ല. 
നിങ്ങളെ പേടിച്ച് ജീവിച്ചാ 
അവരിത്രേം കേടായത്. 


റഫറി 

പാപവും പുണ്യവും തമ്മിൽ 
പണ്ടൊരു ചെറിയ കശപിശ നടന്നപ്പോൾ 
തമ്മിൽ തല്ലി തീരുമാനിക്കാൻ പറഞ്ഞു ദൈവം. 
ജയിക്കുന്നവന് മുന്നിൽ തോൽക്കുന്നവൻ 
അടിമപ്പെടാനായിരുന്നു ദൈവം കൽപ്പിച്ചത്. 
അടി തുടങ്ങി കാലങ്ങളായിട്ടും ആരും 
ജയിക്കുന്നുമില്ല തോൽക്കുന്നുമില്ല. 
അങ്ങിനെ ദൈവത്തിന് ഒരു സ്ഥിരം ജോലിയായി- റഫറി.

ദൈവം 


മനുഷ്യരുടെ വിശ്വാസം മുഴുവൻ
മതങ്ങൾ കൈയ്യടക്കിയപ്പോൾ
ദൈവത്തെ വിശ്വസിക്കാൻ ആരുമില്ലാതായി.
അങ്ങിനെ ദൈവം അനാഥനായി.
സർവ്വശക്തനായ ആ ദൈവം പ്രപഞ്ചത്തിന്റെ
ഏതോ ഇരുളടഞ്ഞ കോണിൽ
ആരാരും തിരിച്ചറിയാതെ ഇന്നും 
അജ്ഞാത വാസം തുടരുകയാണ്.


ദൈവം  മനുഷ്യനാകുമ്പോൾ  


ദൈവം കോപിക്കുമായിരിക്കും 
പക്ഷേ ഒരിക്കലും അസഹിഷ്ണു ആകില്ല. 
അസഹിഷ്ണുത മൂലം കോപിതനാകുന്ന 
ഒന്നിനെ ദൈവം 
എന്ന് വിളിക്കുന്നതിലും 
നല്ലത് മനുഷ്യൻ 
എന്ന് വിളിക്കുന്നതാണ്.

ആൾ ദൈവങ്ങൾ മനുഷ്യരുടെ 
സംപ്രീതി പിടിച്ചു പറ്റുമ്പോൾ 
ചില മത ദൈവങ്ങൾ മനുഷ്യനെപ്പോലെ 
പെരുമാറി സ്വയം ചെറുതാകുന്നു. 


-pravin-

9 comments:

  1. ദൈവം ഈ വിഷയങ്ങളെപ്പറ്റിയൊന്നും ചിന്തിക്കാറുപോലുമില്ല. അദ്ദേഹം അദ്ദേഹത്തിന്റെ ജോലി ചെയ്തുകൊണ്ടേയിരിക്കുന്നു. മനുഷ്യരാണു ദൈവത്തെ തെറ്റിദ്ധരിച്ചിരിക്കുന്നത്

    ReplyDelete
  2. ദൈവത്തെയോർത്തു ഇനി ഒന്നും പറയല്ലേ ഹ ഹ ഹ

    ReplyDelete
  3. ദൈവം ദൈവം എന്ന വാക്കിൽ ലോക ജനതയെ തളച്ചിട്ട ഹേ മനുഷ്യാ ദൈവം ഇപ്പോൾ ഒരു വലിയ തമാശയായി മാറിയിരിക്കുന്നു

    ReplyDelete
  4. ദൈവത്തെ വെറുതെ തെറ്റിദ്ധരീച്ചു....!

    ReplyDelete
  5. കൊള്ളാം, പ്രവീണ്‍

    ReplyDelete
  6. ദൈവത്തിന്റെ ജോലി ദൈവവും, മനുഷ്യരുടെ പണി മനുഷ്യനും നോക്കട്ടെ

    ReplyDelete
  7. ചുറ്റുപാടും കണ്ടും കേട്ടുമാണ് ഇങ്ങിനൊയൊക്കെ മനസ്സിൽ വരുന്നത്. എഴുത്ത് നന്നായി.
    "ഇതിനൊക്കെ ദൈവം നിനക്ക് തന്നോളും."

    ReplyDelete
  8. ഇപ്പോൾ എല്ലാവർക്കും സഹതാപം ദൈവത്തോടാണു ... കാരണം മനുഷ്യന്മാർ എന്നു പേരു വിളിക്കുന്ന ചില മൃഗങ്ങൾ ദൈവങ്ങളേക്കാൾ മുകളിലാണു..... പാവം ദൈവം.. ല്ലേ പ്രവീൺ...

    ReplyDelete
  9. എന്തതിശയമേ.....
    ആശംസകള്‍

    ReplyDelete