കടവാങ്ങോട്ടു കുഞ്ഞിമാക്കം - ഒരു കളിയാട്ടക്കഥ

ഈ അടുത്തായിട്ടാണ് ഞാന്‍  കടവാങ്ങോട്ടു കുഞ്ഞി മാക്കത്തെ കുറിച്ച് ആദ്യമായി കേള്‍ക്കുന്നത്.  അത് വരെ എനിക്ക് അറിഞ്ഞിരുന്ന മാക്കം കടത്തനാട്ടു മാക്കം ആയിരുന്നു. നസീര്‍ , ഷീല അഭിനയിച്ച ആ സിനിമ എന്നെ പോലെ ചിലപ്പോള്‍ നിങ്ങളും കണ്ടിട്ടുണ്ടാകാം. എന്‍റെ മനസ്സില്‍ മായാതെ പതിഞ്ഞ ഈ കഥ ഞാന്‍ നിങ്ങള്‍ക്കും പറഞ്ഞു തരാം.

 മാക്കത്തെ കുറിച്ച് പറയാനുള്ളത് ഒരു ദുരന്ത കഥയാണ്‌. നൂറ്റാണ്ടുകള്‍ക്കു മുന്‍പ് കണ്ണൂരില്‍ പയ്യന്നൂരിനടുത്തുള്ള ഒരു ഗ്രാമത്തിലാണ്  ഈ കഥ നടന്നത്. അന്നത്തെ പടനായകന്മാരുടെ തറവാടായ കടവാങ്ങോട്ടിലെ മാക്കം മൂക്കന്‍ കുറ്റി വീട്ടിലെ കുഞ്ഞിക്കോമനെ വേളി കഴിക്കുകയും അതില്‍ പന്ത്രണ്ടു ആണ്‍ മക്കള്‍ പിറക്കുകയും ചെയ്തു.  ഒരു പെണ്‍കുഞ്ഞിനെ കൂടി അവര്‍ ആഗ്രഹിച്ചിരുന്നു. ഒരുപാട് വഴിപാടുകള്‍ക്കൊടുവില്‍ പിറന്ന ആ പെണ്‍കുട്ടിയാണ് കഥയിലെ മാക്കം.    

അച്ഛന്റെ മരണ ശേഷവും, ആങ്ങളമാരുടെ കുഞ്ഞുപെങ്ങളായി മാക്കം അങ്ങനെ ജീവിച്ചു പോന്നു. പക്ഷെ വിവാഹിതര്‍ ആയതിനു ശേഷം ആങ്ങളമാര്‍ ഭാര്യമാരെ മാത്രം നോക്കി കൊണ്ട് ജീവിക്കുന്നവര്‍ ആയി മാറി.. അവര്‍ക്ക് പെങ്ങളെ ശ്രദ്ധിക്കാന്‍ സമയമില്ലാതെയായി. എന്നാല്‍ കുട്ടി  രാമന്‍ എന്ന ആങ്ങളയും ഭാര്യയും മാത്രം അവളെ പഴയ പോലെ സ്നേഹിക്കുകയും വേണ്ട കാര്യങ്ങള്‍ ചെയ്തു കൊടുക്കയും ചെയ്തിരുന്നു. ബാക്കി  ഭാര്യമാര്‍ നാത്തൂന്‍ പോരുമായി മാക്കത്തെ പലപ്പോളും ഉപദ്രവിച്ചു കൊണ്ടേ ഇരിക്കുന്നതിനിടയിലാണ്  മാക്കത്തിന്റെ മരിച്ചു പോയ അച്ഛന്‍ പണ്ട് മാക്കത്തിന് വേണ്ടി പറഞ്ഞുറപ്പിച്ചു വച്ച  മുറ ചെറുക്കാനായ കുട്ടി നമ്പരുമായി  മാക്കത്തിന്റെ വേളി കഴിയുന്നത്‌ . 

ഒട്ടും താമസിയാതെ തന്നെ  അതില്‍ ചാത്തു, ചീരു എന്ന പേരില്‍ രണ്ട് പൊന്നോമന കുഞ്ഞുങ്ങള്‍ക്ക്‌ മാക്കം  ജന്മം നല്‍കുകയും ചെയ്തു. അതെ സമയം  ഈ പറഞ്ഞ ആങ്ങളമാരുടെ ഭാര്യമാര്‍ക്ക്   ആര്‍ക്കും തന്നെ  ഒരു കുഞ്ഞിക്കാല് കാണാന്‍ കാലങ്ങള്‍ കഴിഞ്ഞിട്ടും ഭാഗ്യം ഉണ്ടായില്ല. തറവാട്ടില്‍ മാക്കത്തിനുള്ള സ്ഥാനമാനവും തങ്ങളേക്കാള്‍ ചെറുപ്പമായ അവള്‍ പെട്ടെന്ന് രണ്ട് കുഞ്ഞുങ്ങളുടെ അമ്മയായി തീര്‍ന്നതും   അവര്‍ക്ക് മാക്കത്തോടുള്ള വൈരാഗ്യവും അസൂയയും വര്‍ദ്ധിക്കാന്‍ കാരണമായി.  

കുശുമ്പും അസൂയയും പരദൂഷണവും മാത്രം തളം കെട്ടികിടക്കുന്ന ആ തറവാട്ടില്‍ അധിക കാലം മാക്കത്തിന്റെ അമ്മയും ജീവിച്ചില്ല. അവരുടെ മരണം മാക്കത്തെ  ഒരുപാട് വിഷമിപ്പിച്ചു. അമ്മയുടെ മരണ ശേഷം , നീണ്ട നാല്‍പ്പത്തി ഒന്ന് ദിവസങ്ങള്‍  തറവാട്ടില്‍ തങ്ങിയ മാക്കത്തെ തിരിച്ചു കൊണ്ട് പോകാന്‍ ഭര്‍ത്താവ് അവിടെ വന്ന അതെ ദിവസം തന്നെ ആങ്ങളമാര്‍ക്കു കോലത്ത് രാജാവിന്റെ പടയ്ക്ക് ചെല്ലാന്‍  പറഞ്ഞു കൊണ്ട് ഓല വന്നു. ആങ്ങളമാര്‍ പടയ്ക്ക് പോയി തിരിച്ചു വരും വരെ കളരിയിലും തറവാട്ടിലും വിളക്ക്  തെളിയിക്കാന്‍ മാക്കം അവിടെ തന്നെ ഉണ്ടാകണം എന്ന് ശഠിച്ച ആങ്ങളമാരെ എതിര്‍ക്കാന്‍ കുട്ടി നമ്പരിനും    സാധിച്ചില്ല. തനിക്കു ഒറ്റയ്ക്ക് ഇവിടെ നാത്തൂന്മാരുടെ കൂടെ താമസിക്കാന്‍ പേടിയാണെന്ന് അവള്‍ ആവതും വട്ടം ആങ്ങളമാരോട് കെഞ്ചി പറഞ്ഞെങ്കിലും അവര്‍ അത് കേള്‍ക്കാന്‍ നിന്നില്ല. 

ഒരു ദിവസം തറവാട്ടിലേക്ക് സ്ഥിരം എണ്ണ കൊണ്ട് തരാറുള്ള  വാണിനെമ്മന്‍ എണ്ണയുമായി ഉമ്മറത്തെത്തി . വാതില്‍ക്കല്‍ നിന്നു ഉറക്കെ വിളിച്ചെങ്കിലും വിളി കേട്ട നാത്തൂന്മാര്‍ ആരും ഉമ്മറത്തേക്ക് ചെന്നില്ല. അവരുടെ മനസ്സില്‍ മറ്റ് ചില കണക്കു കൂട്ടലുകള്‍ ഉണ്ടായിരുന്നു. ആരും വിളി കേള്‍ക്കാനില്ല എന്ന് മനസ്സിലായ മാക്കം ഈറ്റുപുരയില്‍ ആണെന്നും തീണ്ടലായത് കൊണ്ട് മുറ്റത്തേക്ക് വരാന്‍ പറ്റിലെന്നും പറഞ്ഞു. വാണിനെമ്മനോട് എണ്ണ പാത്രം കോലായില്‍ നിന്നു ഉള്ളിലേക്ക് എടുത്തു വക്കാനും പറഞ്ഞു. അയാള്‍ മാക്കം പറഞ്ഞ പ്രകാരം എണ്ണ എടുത്തു ഉള്ളിലേക്ക് വച്ച് മടങ്ങി പോകുന്ന നേരത്ത് അത് കണ്ടു നിന്ന  നാത്തൂന്മാര്‍ കള്ളകഥ കെട്ടി ചമച്ചുണ്ടാക്കി അവളെ ക്രൂശിച്ചു.  അയാളെയും മാക്കത്തെയും കുറിച്ച് ഇല്ലാ വചനങ്ങള്‍ പറഞ്ഞ്   ആങ്ങളമാരെ അവളുടെ ശത്രുക്കളാക്കി. പക്ഷെ കുട്ടി രാമന്‍ എന്ന ആങ്ങളയും ഭാര്യയും ഈ ദുഷ്ടതയില്‍  ഒന്നും പങ്കു ചേര്‍ന്നില്ല.  അവര്‍ മാത്രം അവളെ അവിശ്വസിച്ചതുമില്ല . 

മനസ്സില്‍ മുഴുവന്‍ പെങ്ങളോടുള്ള കടുത്ത പകയുമായി ആ രാത്രി ആങ്ങളമാര്‍ ഉറങ്ങാതെ ഉറങ്ങി നേരം വെളുപ്പിച്ചു. രാവിലെ അവര്‍ വീണ്ടും ഒത്തു കൂടി . എന്നിട്ട് മാക്കത്തെ കൊന്നു തള്ളാന്‍ ഒരു പദ്ധതിയും ആസൂത്രണം ചെയ്തു. അവര്‍  മാക്കത്തോട്‌ കോട്ടയം (കണ്ണൂര്‍- തലശ്ശേരിക്കടുത്തുള്ള ഒരു ഗ്രാമം) വിളക്കുത്സവം കാണാന്‍ തങ്ങളുടെ കൂടെ നിര്‍ബന്ധമായും പോരണമെന്ന് സ്നേഹപൂര്‍വ്വം പറഞ്ഞു, പിന്നെ അവളെ ഇന്നലെ അവിശ്വസിച്ചതിനു മാപ്പും പറഞ്ഞു. പാവം മാക്കം, അവരുടെ കപട സ്നേഹ പ്രകടനത്തില്‍ എല്ലാം മറന്നു കൊണ്ട് തന്‍റെ രണ്ടു കുഞ്ഞുങ്ങളെയും കൂട്ടി പോന്നാങ്ങളമാരുടെ കൂടെ പുറപ്പെട്ട് യാത്രയായി. 

വഴിയിലുള്ള മറ്റ് കാവുകളിലും ക്ഷേത്രങ്ങളിലും കയറി തൊഴുതു യാത്ര ചെയ്യുന്നതിനിടയില്‍ ക്ഷീണം തോന്നിയ മാക്കം കുഞ്ഞുങ്ങളെയും കൂട്ടി പുതിയ വീട് എന്ന ഒരു തറവാട്ടിലേക്ക് വെള്ളം ചോദിച്ച് കയറി ചെന്നു. സ്നേഹമയിയായ ആ തറവാട്ടിലെ അമ്മ കുഞ്ഞുങ്ങള്‍ക്ക്‌ കുടിക്കാന്‍ വെള്ളത്തിന്‌ പകരം ഒരു കിണ്ടിയില്‍ നിറയെ ഇളം ചൂടുള്ള നറും പാല്‍ കൊടുത്തു.  പാല്‍ കുടിച്ച ശേഷം കഴുകിയെടുത്ത ആ കിണ്ടിയില്‍ മാക്കം തന്‍റെ ആഭരണങ്ങള്‍ ഊരി ഇട്ടു കൊടുത്തു, എന്നിട്ട് അതെല്ലാം തിരിച്ചു വരുമ്പോള്‍ എടുത്തു കൊള്ളാമെന്നും പറഞ്ഞു. തറവാട്ടമ്മ അത് സമ്മതിക്കുകയും അപ്പോള്‍ തന്നെ വീട്ടിനകത്ത് ഭദ്രമായി കൊണ്ട് എടുത്തു വക്കുകയും ചെയ്തു. അങ്ങനെ മാക്കം പുറത്തു കാത്തു നിന്നിരുന്ന ആങ്ങളമാരുടെ കൂടെ വീണ്ടും യാത്രയായി. 

 ആളൊഴിഞ്ഞ ഒരു വഴിയില്‍ എത്തിയ നേരം ആങ്ങളമാര്‍ മാക്കത്തോട്‌ ഒരു അത്ഭുത കിണറിനെ കുറിച്ച് പറയുകയുണ്ടായി. ആ കിണറില്‍ നോക്കിയാല്‍ നട്ടുച്ച നേരത്തും നക്ഷത്രങ്ങള്‍ തിളങ്ങുന്നത് കാണാം എന്നും കൂടി പറഞ്ഞതോട് കൂടി മാക്കം അത് വിശ്വസിച്ച് കിണറ്റില്‍ എത്തി നോക്കി. ആ സമയത്ത് ആങ്ങളമാര്‍ അവളെ അവിടെ ബലമായി പിടിച്ചു നിര്‍ത്തി കൊണ്ട് കഴുത്തില്‍ വാള് കൊണ്ട് വെട്ടി . കുഞ്ഞുങ്ങളായ ചീരുവിനെയും ചാത്തുവിനെയും അത് പോലെ തന്നെ കഴുത് വെട്ടി തുണ്ടം തുണ്ടം ആക്കി പൊട്ട കിണറ്റില്‍ തള്ളി. ഈ അറുംകൊലക്ക് അവിചാരിതമായി ദൃക്സാക്ഷിയാകേണ്ടി  വന്ന മാവിലോന്‍ എന്ന കാടും പൊന്തയും വെട്ടി തെളിയിച്ചു കൊണ്ടിരുന്നവനെയും അവര്‍ അതെ കിണറ്റിലേക്ക് കൊന്നു തള്ളി. അതെ രാത്രി തന്നെ മാക്കം, സത്യ  സ്വരൂപിണി   ദേവിയായി പുനരവതരിക്കുകയും  കടവാങ്ങോട്ടു തറവാട്ടില്‍ തിരിച്ചു വരുകയും കുട്ടിരാമന്‍ എന്ന ആങ്ങളയെയും ഭാര്യയേയും  ഒഴിച്ച് മറ്റെല്ലാവരെയും ചുട്ടു ചാമ്പലാക്കി എന്നുമാണ്  കേട്ടു കഥ . 

സംഹാര കലശത്തിന് ശേഷം ദേവി പുതിയ വീട് തറവാട്ടിലെ ചെമ്പക മരത്തോടു ചേര്‍ന്ന് നില്‍ക്കുന്ന ശ്രീകോവിലില്‍ കുടിയിരുന്നു എന്നും പറയപ്പെടുന്നു. (കണ്ണൂരില്‍ നടത്തി കൊണ്ടിരിക്കുന്ന കളിയാട്ടങ്ങളില്‍ ഈ കഥകള്‍ ഇപ്പോളും നിറഞ്ഞു നില്‍ക്കുന്നു )

ഈ കഥ കേട്ടറിഞ്ഞ  ശേഷം എന്‍റെ മനസ്സില്‍  ഒരു നീറുന്ന ഓർമ്മപ്പെടുത്തലായി  മാക്കത്തിന്റെ കഥ വീണ്ടും വീണ്ടും വന്നു പൊയ് കൊണ്ടേ ഇരിക്കുന്നു. പഴയ കാലങ്ങളിലെ  ഇരുളടഞ്ഞ വഴികളിലും  കാട് പിടിച്ചു കിടക്കുന്ന ഇന്നത്തെ പല പഴയ തറവാട് വളപ്പുകള്‍ക്കും ഇത് പോലെ ഇനിയും ഉണ്ടാകാം പറയാന്‍ മാത്രം ഉള്ള ദുരന്ത കഥകള്‍..,. ആചാരങ്ങളും അനാചാരങ്ങളുമായി അവ നമ്മുടെ മുന്നില്‍ കഥ പറയാന്‍ എത്തുമ്പോള്‍ നമ്മള്‍ വിസ്മരിക്കാതിരിക്കേണ്ട ഒരു കാര്യമാണ് നമ്മുടെ കലാ സംസ്കൃതി. കളിയാട്ടങ്ങള്‍, തെയ്യങ്ങള്‍ , തോറ്റങ്ങള്‍, പൂരക്കളി  എന്നൊക്കെ നമ്മള്‍ പേരിട്ടു വിളിക്കുന്ന പല കലാരൂപങ്ങള്‍ക്കും പുറകില്‍ ഇത്തരം ദുരന്ത കഥകള്‍ക്കും പറഞ്ഞറിയിക്കാന്‍ സാധിക്കാത്ത ഒരു വലിയ സ്ഥാനം ഇല്ലേ എന്ന്  തോന്നി പോകുന്നു. 

(ഈ വിഷയത്തെ കുറിച്ച് എനിക്ക് അത്ര വലിയ വിവരങ്ങള്‍ ഒന്നും ഇല്ലാതെ കഥ കേട്ടു കൊണ്ട് മാത്രം എഴുതിയതാണ് ഇതെല്ലാം . ഏതെങ്കിലും ഭാഗത്ത്‌ എന്തെങ്കിലും തെറ്റായ പരാമര്‍ശങ്ങള്‍ ഉണ്ട് എങ്കില്‍ അതെന്‍റെ എഴുത്തിന്റേയും എനിക്ക് കിട്ടിയ   വിവരത്തിന്റെയും പോരായ്മയായി മാത്രം കാണുക )  

(കടപ്പാട് - യാത്രക്കിടയില്‍ പരിചയപെട്ട കണ്ണൂരുകാരന്‍ ഒരു സുഹൃത്ത്  )

-pravin-